تامر حسني يكشف لأول مرة معاناته قبل الشهرة: راتبي كان 22 جنيهاً

 كشف الفنان تامر حسني عن معاناته قبل الشهرة في رسالة حاول بها بث الأمل في نفوس بعض الشباب الذين يعانون من اليأس والإحباط بسبب عدم قدرتهم على النجاح.

وفي رسالة مطولة له عبر حسابه الرسمي على انستغرام، نشر حسني رسالة مطولة لمتابعيه وقال: " بعضكم واصل لفقدان الامل و الشغف و بعضكم فاقد الامل في الحياه نفسها، هطلب طلب منكم قبل اي شيء افتكروا معاناتي في بدايتي و ظروفي الصعبه من غير اب و منغير اي فلوس و بنزل اشتغل في الشوارع من عامل بنزينه لسوبر ماركت لفاعل يعني اللي بيبنوا العمارات بطلع طوب و اسمنت عشان ارجع بيتي لامي الغلبانه بأي خمسه جنيه بالإضافه لمرتب النادي لما كنت بلعب كوره كان مرتبي ٢٢ جنيه في الشهر منهم بقى تحويشة الميه و الكهربا و عمليات اخويا عشان كان عيان لفتره كبيره كنت بعمل المستحيل فعلاً عشان امي و اخويا و عشان اوصل لهدفي ".

رسالة تامر حسني

وأكمل في رسالته: "كان جوايا سعي دائم لطريقين الكوره و الغناء و بقول دا عشان ناس كتير عايز انصحها بالخطه البديله عشان لو الحلم مجاش يكون في غيره زي ما انا كان نفسي ابقى لاعب كوره و الكوره مش ليا و الانديه كلها مشوني رغم تفوقي كنت بسأل نفسي ليه الابواب كلها بتتقفل في وشي اتاريها بتتقفل عشان توجهني لمسار اخر و لما آمنت بكده فهمت قدام ان ربنا كان شايلي الاحسن ليا بس ساعتها مكنتش فاهم ،، واللي بيسأل نفسه دلوقتي يعني انا اكمل في حلمي ولا اشوف حلم تاني هقوله دايماً اطلب من ربنا يساعدك هتلاقي علامات بتجيلك بس الشاطر اللي يفهمها  علامات هتأكدلك تكمل او لا بس اجتهد و اتعب عشان المجهود دا ليه كرم متحوشلك في مجالك التاني ف اوعى تقول تعبت عالفاضي".

وواصل رسالته: "  بالنسبه للمحبطين هيفضلوا موجودين انت اللي بتسمعلهم و انت اللي بتسمح انك تتأثر بيهم امنع دا فوراً متبقاش السبب في اذية نفسك متتشدش غير لكل جميل و لكل ايجابي هتلاقي كل الحلو بيجيلك و متعملش العكس عشان هيجيلك برضو عشان كدا بقولك انت السبب دايماً قول يارب و اجتهد و افهم ان الراحه المطلقه في الجنه بس و احنا على الارض و ربنا قال انه خلقنا في كبد يعني شقاء عشان يكون عندنا تحدي نكسبه ولازم نكسبه عشان كتير قبلينا كانت ظروفهم اصعب و وصلوا يبقى الموضوع فينا ، متبقاش اكبر عدو لنفسك ، انت السبب".

وختم: " خد قرار صارم فوراً في التغير و النهوض و النجاح، والله هتوصل متسمعش غير لقلبك و سلم قلبك للّي خلقه و توكل على الله ".

 

 

 

 

View this post on Instagram

 

 

 

 

 

 

 

 

 

 

 

A post shared by Tamer Hosny (@tamerhosny)