;

أغاني سيد حجاب... أجمل كلمات تترات المسلسلات مكتوبة

  • تاريخ النشر: الأحد، 19 يونيو 2022
أغاني سيد حجاب... أجمل كلمات تترات المسلسلات مكتوبة

أغاني سيد حجاب التي بروزت وغرست أشعاره المدهشة والرائعة بالعامية المصرية في وجدان العالم العربي، هو واحد من أهم شعراء العامية وتترات المسلسلات التي كتبها لا ولن تُنسى، سيد حجاب من مواليد عام 1940 ورحل عن عالمنا في عام 2017، لكن ما أثرى به عالمنا من أشعار ستظل خالدة، في هذا المقال، نستعرض أهم كلمات أغاني سيد حجاب وأهم تترات المسلسلات مكتوبة كاملة.

أغاني سيد حجاب

كلمات أغنية مش هتبطل لف الدنيا

مش بتبطل لف الدنيا ولا هتبطل لف

ده اللي يبص لحال الدنيا يضرب كف بكف

دنيا بتلعب بينا الكورة، نجري نلف شمال ويمين

وحياتنا فيها فزورة، مين فينا اللي يحلها مين؟

دنيا غروره ولا السنيورة أم ملاية لف

ده اللي فكر نفسه فهمها يبقى حقيقي أتهف

ساعة تكون حلوة وقمورة، وساعة تخلي القلب حزين

مين الأصل ومين الصورة فيكي يا دنيا البني آدمين؟

ساقية ودايرة وطالعة ونازلة وعمر الدمع ما جف

بس الدمعة وراها الضحكة ووسط الضلمة نجف

وحياتنا فيها مهدورة بين ضحكة وآهة وأنين

وقلوبنا التايهة معذورة، عيني علينا احنا يا تايهين

كلمات أغنية أراجوز المدارس

أراجوز، أراجوز، إنما فنان، فنان، أيوه، إنما أراجوز

ويجوز يا زمان أنا كنت زمان، غاوي الأرجزة طياري، يجوز

إنما لما الكيف بقى إدمان، باجي أبص لشيء واحد أرى ، جوز

أرى إيه؟ أرى إيه؟ أرى، أرى أراجوز

فلسان، كحيان، أيوه أنا فلسان، إنما برضك راجل إنسان

بضرب بالألف لسان ولسان وباكلها بعرقي ومش إحسان

راجل والرجولية لا عضلات، ولا ألابندة وسيما وحركات

الرجولية الحقيقية ثبات، قدام جبونية أي جبان

أراجوز أنا وأحمي أرى، أرى إيه؟ أحمي قراريط الناس من مين؟

من الناس الأرى، أرى إيه، أرى إيه؟ من الناس القراميط الملاعين

ما هو أصل أنا مش من الأرى،  أرى إيه، مش من القراطيس

ولو الحال مال مقعدش أنا على أرى إيه أرى إيه؟ قرافيصي وأطنش ع الأندال

لازم أشك الأندال مهموز، وأدوس ع اللي افترى والعنطوظ

ما أنا أرى إيه، أرى إيه؟ أرى، أرى أراجوز

أراجوز وشجيع والدنيا ميدان، فارس، حارس واقف ددبان

وإذا بان للشر نيبان وزبان باحمي الغلبانة والغلبان

وشجاعتي ما هياش في الطاخ طيخ، دي شجاعة تفكير وتماخيخ

الأرض أضربها تجيب بطيخ، بذكاوتي وأخلي الخلا بستان

أراجوز أنا والدنيا أرى إيه؟ قرشانة وإحنا شبر شبيط

ياما قرمتني وأرى، أرى إيه؟ قرصتني ف لباليبي وأنا كبير

فسرحت أنفخ أرى إيه أرى إيه؟ أراغيلها وأغني يا ليلي يا عين

وأتمسخر على أرى إيه أرى إيه؟ أراذلها الفجرة الطماعين

وأضَّحَك كل صبي وعجوز ع اللي بيتنطط فرقع لوز

مانا أرى إيه؟ أرى، أرى أراجوز

أراجوز وسايقها هبل في جنان وأنا قلبي، مليان جدعنة وحنان

وأبان ساهي سهتان سهيان، إنما عقلي للعدل ميزان

أنا فلتة، إنما مش فلتان وساعات حرنان وساعات زنَّان

يمكن علشان وحداني، ما ليش أراجوزة تاخدني بالأحضان

أراجوز أنا وأقدر أرى، أرى إيه؟ أراعيكي وأشيلك في عيوني

وإذا مرة زعلتي أرى، أرى إيه؟ أراضيكي بعقلي وبجنوني

حُطِّي من السما على أرى إيه؟ أراضيّه وأسلم لِك أمري

وكُلِي معايا في أرى إيه أرى إيه؟ قروانتي يا كروانة عمري

وبَدَل منا كده ملوي الَبَزبوز، أصبح لك جوز معزوز محظوظ

إيه يا ترى إيه؟ أرى، أرى أراجوز، أرى إيه؟ أرى إيه؟ أرى، أرى أراجوز

كلمات أغاني الشاعر سيد حجاب

كلمات مقدمة مسلسل أرابيسك

وينفلت من بين أيدينا الزمان، كأنه سحبت قوس في أوتار كمان

وتنفطر ليّام، عقود كهرمان، يتفرفط النور والحنان والأمان

وينفلت من بين أيدينا الزمان

الشر، شرَّق وغرَّب، داخل لحوشنا

حوشوا، لا ريح شاردة تقشقش عشوشنا

حوشوا، شرارة تطيش، تشقق عروشنا

وتغشنا المرايات، تشوش وشوشنا

وتهيل تراب ع الهالة والهيلمان

وينفلت من بين أيدينا الزمان

الغش طرطش، رش ع الوش بُوية

ما دريتش مين بلياتشو أو مين رزين

شاب الزمان وشقيقي مش شكل أبويا

شاهت وشوشنا، تهنا بين شين وزين

ولسه يا ما وياما ح نشوف كمان

وينفلت من بين أيدينا الزمان

كلمات تتر نهاية مسلسل أرابيسك

ويرفرف العمر الجميل الحنون ويفر ويفرفر في رفة قانون
وندور، نلف ما بين حقيقة وظنون وبين آسى هفاف وهفة جنون
ويرفرف العمر الجميل الحنون

دنياك سكك، حافظ علي مسلكك وأمسك في نفسك لا العلل تمسكك
وتقع في خية تملكك، تهلكك، أهلك، يا تهلك دا انت بالناس تكون
ويرفرف العمر الجميل الحنون

إن درت ضهرك للزمن يتركك، لكن سنابك مهرته تفركك
وإن درت وشك للحياة تسبكك والخير يجيك بالكوم وهمك يهون
ويرفرف العمر الجميل الحنون

سيد حجاب تترات مسلسلات

تتر ليالي الحلمية

منين بيجي الشجن، من اختلاف الزمن ومنين بيجي الهوى، من ائتلاف الهوى

ومنين بيجي السواد، من الطمع والعناد ومنين بيجي الرضا، من الإيمان بالقضا

من انكسار الروح في دوح الوطن، يجي احتضار الشوق في سجن البدن

من اختمار الحلم يجي النهار، يعود غريب الدار لأهل وسكن

ليه يا زمان ما سبتناش أبرياء، وواخدنا ليه في طريق ما منوش رجوع

أقسى همومنا يفجر السخرية وأصفى ضحكة تتوه في بحر الدموع

ولفين ياخدنا الأنين، لليالي ما لهاش عينين

ولفين ياخدنا الحنين، لواحة الحيرانين

ما تسرسبيش يا سنينا من بين أيدينا ولا تنتهيش ده احنا يا دوب ابتدينا

واللي له أول بكرة حيبان له آخر وبكرة تفرج مهما ضاقت علينا

ولفين ياخدنا الأنين، لليالي مالهاش عينين

ولفين ياخدنا الحنين، لواحة الحيرانين

لا بد من بكره اللي طال انتظاره، ده مهما طال الليل بيطلع نهاره

ومهما طال درب الهموم والمساخر، لابد ما يعود المسافر لداره

أغاني سيد حجاب وعلي الحجار

كلمات أغنية اللي بنى مصر

بندق ندق بوابة الحياة بالإيدين قومي، قومي افتحي

لولادك الطيبين قومي، قومي

اللي بنى، بنى مصر كان في الأصل حلواني

وعشان كده مصر يا ولاد مصر يا ولاد حلوة الحلوات

اللي بنى، بنى مصر كان في الأصل حلواني

وعشان كده مصر يا ولاد مصر يا ولاد حلوة الحلوات

اللي بنى مصر كان في الأصل حلواني

وعشان كده مصر يا ولاد مصر يا ولاد حلوة الحلوات

وادي وبوادي وبحور وقصور ومواني توحيد وفكر وصلاة

تراتيل غنا وابتهالات وكل ده في مصر يا ولاد مصر يا ولاد حلوة الحلوات

اللي بنى، بنى مصر كان في الأصل حلواني

وعشان كده مصر يا ولاد مصر يا ولاد حلوة الحلوات

اللي بنى مصر كان حلواني يا ولداه حلواني، حلواني

اسمه على بوابتها لا زال ولا زايل، لا زال ولا زايل

ساعة الهوايل يقوم قايل، يا بلدي، يا بلدي وييجى شايل

هيلا هوب شايل، هيلا هوب شايل حمولها ويعدل المايل

وعشان كده مصر يا ولاد حلوة الحلوات

اللي بنى، بنى مصر كان في الأصل حلواني

وعشان كده مصر يا ولاد مصر يا ولاد حلوة الحلوات

بحلم يا صاحبي وأنا لسه بأحبي، بدنيا تانية ومصر جنة يا صاحبي

وأجي أحقق الحلم، ألقى الموج عالي، عالي، عالي، عالي طاح بي

ونعود سوا نطوي الأنين بالحنين ونعود سوا نطوي الأنين بالحنين

وعشان كده مصر يا ولاد حلوة الحلوات

اللي بنى، بنى مصر كان في الأصل حلواني

وعشان كده مصر يا ولاد مصر يا ولاد حلوة الحلوات

كلمات تتر الشهد والدموع

تحت نفس الشمس، فوق نفس التراب، كلنا بنجرى ورا نفس السراب

كلنا من أم واحدة، أب واحد، دم واحد، بس حاسين باغتراب

ليه بنتغرب في دنيتنا الغريبة؟ ليه نقابل كل شيء بشكوك وريبة؟

وإحنا لو عشنا حياتنا بصفو نية، نجمة الحلم البعيد تبان قريبة

في زمان الغربة دُرنا، ياما دُرنا، ريح بتبدرنا وريح تضرب صدورنا

بس طول ما قلوبنا مليانة محبة، كل هبة ريح هنا تثّبت جدورنا

ليه تفرقنا الأماني والمطامع؟ إيه يفيدني المال إذا ما مال زماني