;

إنسانيات: بنت الزبال..

  • تاريخ النشر: الثلاثاء، 25 فبراير 2020
إنسانيات: بنت الزبال..

قصة حقيقية وتم حذف الاسم

أهلا بكم في مقال جديد من #إنسانيات .. بعض هذه المقالات هي حقيقية وواقعية عاشها البعض ولكن تم حذف الأسماء وبعض المقالات قد تكون من نسج الخيال ولكنها هي مقالات تجعلنا نُفكر ونتأمل بالأنسانية. نرجوا من الجميع احترام الخصوصيات ومشاركة هذه المقالات حبذا أن تكون مفتاح للأجيال التي قد نسيت أصولها لأسباب متعددة. لقد ولد الإنسان لعمل الخير فلنعمل لهذا الهدف.

كان يامكان في قديم الزمان..

بنت الزبال هيك كانو ينادوني .. بالمدرسة بالحارة بكل مطرح . نسيوا اسمي و نادوني بنت الزبال .??.

أبي كان عامل بالبلدية و كنا ساكنين ببيت بسيط بمنطقة بسيطة اسمها نبعة . ما كنا ناكل زبالة متل ما كان ينحكى علينا كنا عيلة متل اي عيلة نطبخ و نسهر و نضحك سوا . تلات صبيان و بنتين انا أكبرهم .
بالمدرسة ما التفتوا لشطارتي و تفوقي شافوني بس بنت الزبال . بالصف قلال كتير الي يحكو معي و كتار منهم يخجلوا يقعدو حدي او يمكن يقرفوا بيفكروني ما بتحمم او ريحتي زبالة .

إنسانيات: بنت الزبال..

و لما سألتني المعلمة شو حلمك بس تكبري ردت بنت ورايي حلمها تلم الزبالة و ضحكوا كلهم بس انا بكيت.
ضمتني معلمتي لصدرها وهمست بأذني لا تزعلي و لا تخجلي من شغل ابوكي من زمان
ابي كان يشتغل ناطور بناية و يشطف الدرج و يلم التياب القديمة و نلبسها و نفرح فيها كمان .
كوني قوية .


اي رح كون قوية هيك قررت ما رح اضعف ما رح خلي حدا يضحك عليي . علمت اخواتي يكونو أقوى مني .
علمتهم انو لازم ما نضعف و ما نسمح للزمن يكسرنا . مرت سنين طويلة و نجحت بالبكالوريا و تفوقت الحمد لله و دخلت كلية الطب . و هون تغيرت صارو ينادوني إجت الدكتورة و راحت الدكتورة .

إنسانيات: بنت الزبال..
حسيت اني عم طير فرحت بحالي و كأني كسرت كل شي كان قاهرني . كل الي ضحكوا عليي اجى وقت و احتاجوني و الله بيعلم اني ما قصرت بحق حدا منهم .


كبرت و كبرو اخواتي . تغيرت الأحوال و أبي ما عاد بحاجة يشتغل غيرنا بيتنا و ضلينا ايد واحدة . اخواتي الشباب اثنين مهندسين و التالت عم يدرس طب أسنان و اختي بكلية الصيدلة . . تزوجت و صار عندي ولدين و اخواتي منهم خاطب و منهم متزوج الله يوفقهم بعمرهم بس ما ممكن ننسى انو بيوم من الايام كان اسمنا ولاد الزبال .
أبي الي كانت هالكلمة تدبحه اكتر منا . بس نحنا ما نسينا فضله و لا خجلنا فيه . المهم ربانا عاللقمة الحلال . أبي الي بكي وقت قلتله ما حدا عم يقبل يقعد جنبي بالصف . .

علموا أولادكم يكونوا حناين و لا يقسوا قلوبهم اذا الزمن قاسي.

استاذة طب الاعصاب بجامعة حلب